Foda publikon listën: Dy emra të rinj te Kosova, mungon Rashica – rikthehet Zhegrova
Kombëtarja e Kosovës më 5 shtator nis fushatën kualifikuese drejt Kampionatit Botëror “USA-Kanada-Meksikë 2026”, me ndeshjen e parë në Basel ndaj Zvicrës, ndërsa më 8 shtator pret Suedinë në stadiumin “Fadil Vokrri” të Prishtinës.
Për këto dy duele të rëndësishme, përzgjedhësi Franco Foda ka shpallur listën prej 26 futbollistësh, ku bien në sy dy emra debutues: Leon Avdullahu, i cili refuzoi Zvicrën për të zgjedhur Kosovën, si dhe Veldin Hodza, mesfushor i Rubin Kazanit që më parë ishte pjesë e Kroacisë U21.
Në anën tjetër, mungesa më e madhe është ajo e Milot Rashicës, i cili nuk është ftuar për shkak të një lëndimi. Lajm i mirë për “Dardanët” është rikthimi i Edon Zhegrovës, i cili mungoi në dy grumbullimet e fundit.
Formë e ndryshme mes lojtarëve
Porta: Arijanet Muric mbetet numri një, ndonëse debutimi i tij me Sassuolon në Serie A nuk shkoi siç pritej. Amir Saipi dhe Visar Bekaj kompletojnë repartin.
Mbrojtja: Amir Rrahmani vazhdon të jetë shtylla kryesore te Napoli, ndërsa Mërgim Vojvoda po shkëlqen me Comon në Serie A. Florent Hadërgjonaj dhe Fidan Aliti përfaqësojnë eksperiencën turke, kurse të rinjtë si Dion Gallapeni po shfaqen me formë të mirë në Poloni.
Mesfusha: Përveç debutuesve Hodza dhe Avdullahu, vëmendje merr edhe forma e mirë e Meriton Korenicës me Clujin. Elvis Rexhbeçaj po kalon momente të vështira te Augsburgu, ndërsa Valon Berisha ruan vendin për shkak të eksperiencës.
Sulmi: Përveç “piratit” Vedat Muriqi, i cili e nisi sezonin me karton të kuq në La Liga, Kosova gëzon golat e Albion Rrahmanit me Sparta Pragën, formën e mirë të Florent Muslijës në Bundesliga 2, si dhe paraqitjet premtuese të Fisnik Asllanit me Hoffenheimin.
Përballje të forta
Zvicra dhe Suedia janë dy kundërshtarë të nivelit të lartë, por me rininë që po shtohet në ekip dhe rikthimin e disa lojtarëve kyç, Kosova shpreson të marrë rezultat pozitiv në fillim të kësaj aventure drejt Botërorit 2026.
